Ministrja e Mjedisit dhe Planifikimit Hapësinor Albena Reshitaj po merr pjesë në konferencën me Kryetarë të Komunave të Republikës së Kosovës, të organizuar nga Ministria e Administrimit të Pushtetit Lokal me mbështetjen e misionit të OSBE-së në Kosovë.

Gjatë kësaj konference ministrja Reshitaj iu drejtua me një fjalë rasti kryetarëve të Komunave në lidhje me shumë çështje të mjedisit dhe planifikimit hapësinor për të cilat komunat duhet të angazhohen më shumë.

“Kosova ka ligje dhe akte nënligjore konformë direktivave të Bashkimit Evropian, por zbatueshmeria e tyre nuk është në nivelin e duhur, kemi investuar në shumë projekte kapitale të cilat nuk janë menaxhuar si duhet nga institucionet përgjegjëse, andaj kërkojë nga ju që bashkërisht t’i shtyjmë proceset përpara” u shpreh Reshitaj.

Ministrja Reshitaj iu drejtua me porosi të qarta edhe kryetarëve të komunave me shumicë serbe, pjesëmarrës në këtë takim.

Ajo tha se mjedisi, natyra është e përbashkët dhe e tillë duhet të trajtohet, andaj kërkojë që vullnetarët e të gjitha komuniteteve që jetojnë në Kosovë t’i bashkohen iniciativave tona për pastrimin dhe gjelbërimin e shtetit tonë.

“Më vjen keq për ata fëmijë që tani janë bërë burra e gra, që kanë bërë e vazhdojnë të bëjnë jetë të izoluar, me dhjetëra gjenerata që nuk kanë çfarë të kujtojnë nga
fëmijëria e tyre pos urrejtjes, izolimit, mos qasjes në liri e integrim shoqëror.

Ju lus që të ndalojmë së mbjelluri urrejtje tek fëmijët tonë, ne jemi ata që më së miri i dimë pasojat sepse i kemi bartur vetë mbi supet tona.

Jemi ne ata që mund dhe duhet të fillojmë kthesën e proceseve në drejtim të duhur, andaj ju ftojë të gjithëve që bashkë të punojmë për ndërtimin, zhvillimin dhe integrimin e shtetit tonë në mekanizmat ndërkombëtar” përfundoi ministrja Reshitaj./Arbresh.info